مقدم الصداق ومؤخر الصداق والصداق المسمى بيننا
 |
| مقدم الصداق ومؤخر الصداق والصداق المسمى بيننا |
بقلم المستشار محمد فؤاد
ناس كتير مش عارفه يعنى ايه مقدم الصداق ويعنى ايه مؤخر الصداق ويعنى ايه الصداق المسمى بيننا ... بص ياسيدى اى واحده حتتجوز شرعا ليها مهر بيكون جزء منه فى الشبكه مثلا أو مبلغ معين بيتم الاتفاق عليه حسب العرف وظروف كل أسره وإمكانية كل زوج وبيكون الاتفاق مثلا أن الزوج يدفع جزء من المهر ده فى بداية الزواج ويتم إثباته فى قسيمة الزواج وده بقى اسمه مقدم الصداق وبيكون مكتوب فى القسيمه واتفق الطرفان على مبلغ الصداق وقدره كذا والحل منه كذا ومعنى كلمة الحال هو ماتم دفعه وقت إبرام العقد وده إلى الزوجه ملتزمه برده فى حالة الخلع ... وبيكون المؤخر أو المؤجل منه كذا وده اسمه مؤخر الصداق وده فى ناس كتير بتبقى فاكره أن مؤخر الصداق ده الزوج بيدفعه فى حالة الطلاق وده مش صح ... مؤخر الصداق ده دين فى رقبة الزوج وممكن الزوجه تطالب به حتى لو لسه متزوجه وعلى ذمته ولو الزوج توفى يحق للزوجه مطالبة مؤخر صداقها من الورثه مدام لم يثبت فى القسيمه أن مؤخر الصداق يستحق عند احد الاجلين ( يعنى فى حالة الطلاق او الوفاه أو إنهاء العلاقه الزوجيه ) بخلاف كده يحق للزوجه المطالبه بمؤخر صداقها اى وقت وياريت ماننساش انه دين فى رقبة الزوج ويستحق الأداء ... طيب ويعنى ايه الصداق المسمى بيننا علشان فى ناس كتير فاكره أن علشان مكتوب فى القسيمه والصداق المسمى بيننا يبقى مالهاش مؤخر صداق .. أحب اقولكم أن الكلام ده مش صح معنى كلمه الصداق المسمى بيننا هو صداق المثل يعنى ايه ؟؟ يعنى من حقها مؤخر صداق زى مؤخر صداق أختها أو بنت خالتها أو بنت عمها أو أى حد فى نفس سنها ونفس مستواها وده طبعا سهل أن احنا نثبته يعنى مش معنى انك مكتوبلك الصداق المسمى بيننا يبقى مالكيش حاجه ومش من حقك مؤخر الصداق
0 التعليقات:
إرسال تعليق